गजल



घुम्टो ओढाई बेहुलीलाई चट्ट डोली तार्छु म
यसपालीको मंसिरमा त,पक्कै झ्याई पार्छु म !



सब्को जोडी लठ्ठिदै कानेखुसी गरी हिड्छन्
सुटुक्कै एउटी खोजी,त्यस्तै साउती मार्छु म !



जोरीपारी भेला भै, मेरै कुरा काटी हिड्छन्
एउटीलाई अघि लगाई सब्को सेखी झार्छु म !



के कम् छु'र म पनि,देखाइदिन्छु सबैलाई
सब्को भन्दा मेरै राम्रो,एउटा जोडी नार्छु म !



दोबाटोमा भेट हुँदा, मेरै हाँसो उडाउनेको
घमण्डको पोका सबै उचालेर नै पछार्छु म !



- भीमराज पाराङ कुवैत